KUNAMATIRA RUGARE MUSARUDZO Mwari Wamasimbaose, ndimi Musiki wazvose. Makatipa nyika ino yakanakisisa yeZimbabwe navanhu vayo. Makatipa Mwanakomana wenyu Jesu Kristu kuti atipinze muUmambo hwenyu, uye kuti atiratidze kubata basa nokugara pamwechete murudo, murugare, mukuwadzana, mukuwirirana, nomuruenzaniso. Tinokutendai nokutipa mukana musarudzo yedu kuti tisarudze vatungamiri vanozotibatsira kudzika Umambo hwenyu munyika yedu. Tenzi wedu Jesu, makaparidza nezvoUmambo hwedenga hwamunokoka munhu wose zvake, pasina wamunosiya. Umambo uhwu hwakafanana nomuti mukuru wokuti shiri dzinogona kuvakira matendere adzo pamapazi awo (Mateu 13:31-32). Ndiwo mabiko makuru anokokwa munhu wose (Mateu 22:1-14). SoMufudzi Wakanaka, munoda, munoremekedza uye munokudza imwe neimwe yehwai dzenyu, kusvika pakudzifira (Johani 10:15). Dai vanhu vomuZimbabwe vaita sarudzo yakasununguka, inotungamirirwa nehana dzavo, uye nomoyo wakachena. Dai waro sarudzo ino yatipa vatungamiri vanoshandira vanhu zvechokwadi, sezvamakaita imi zvokuuya kuzoshandira vamwe kwete kuzoshandirwa (Mariko 10:45). Imi munoda kuti vana venyu vose vawane upenyu huzere (Johani 10:10). Tinonamata kuti sarudzo ino iitwe mune zvakanaka, muchokwadi uye nenzira iri pachena. Tinonamatawo kuti Umambo hwenyu hworudo, rugare, ruenzaniso norusununguko, husvike (Mateu 6:10). Dai waro munamato wedu warega kuva chichemo chisina maturo, kana kungova chiroto. Tinokumbira kuti Umambo hwenyu huburukire munyika yedu yeZimbabwe, patinopedzisa tichinamata pamwechete namazwi atakadzidziswa naTenzi Wedu, tichiti: “Baba vedu....” Ameni. 9