nomazvo kupinda mune zvose zvesarudzo iyi yakakosha kudayi muutongi
hunofadza ruzhinji. Kurwisana nokukandirana mabhomba nezvinokuvadza
kuchangobva kuitika kunosuwisa uye hakukurudzirwi sezvo kuchidzosera
shure budiriro yenyika.
[4] SamaBhishopi eChiKatorike, sarudzo dzakapfuura dzisati dzaitwa,
takataura pamusoro pezvinodikanwa kuti sarudzo dzinzi dzakaitwa
murusununguko nomuruenzaniso. Takagoverana nemi pfungwa dzedu
pamusoro pokuti VaKristu navamwe vanhu vanotarisira chii kuti vaite
sarudzo vakasununguka, zviri maererano neBumbiro redu roMutemo.
Mutsamba yedu inonzi "Only When Power Stands Under God's Blessing Can
It Be Trusted" (yatakanyora muna December 2007, tisati taita sarudzo
ya2008), takataura kuti: "...tinokurudzira Hurumende namapato ose ari
kukwikwidza kuti aumbe kugarisana kwakanaka kwavanhu, aite
zvamatongerwo enyika zvakanaka, nokuumba upfumi hwenyika nenzira
inosimudzira hunhu kwakanaka".
Takakurudzira kuti vanhu vaite sarudzo vakasununguka, zvine ruenzaniso,
zvinoita kuti sarudzo igamuchirike navanhu vomunyika muno uye
nevedzimwe nyika. Mukutaura izvi chinangwa chedu chaiva chokuvaka
hwaro hwoUmambo hwaMwari pasi pano, Umambo hworunyararo
norugare, rudo, ruenzaniso norusununguko. Iri ndiro basa guru reSangano.
[5] Muna March 2013, mutsamba yedu inonzi Zimbabwe Elections and the
God of Second Chances (yatakanyora sarudzo ya2013 isati yaitwa), takati:
“Tinokurudzira mapato ose ari kukwikwidza kuti anyorerane chibvumirano
chamaitiro nokuzvibata kunotarisirwa kumapato ezvamatongerwo enyika
omuZimbabwe (The Zimbabwe Political Parties Code of Conduct)".
Mapato ose anofanira kunge akasununguka kukwezva vanhu
nokushambadzira zvirongwa zvawo achichengetedza chibvumirano ichi,
kuitira kuti vanosarudza vose vazviite vakasununguka uye vaine ruzivo
rwakakwana. Takataura kuti: "Mapato anokwikwidza musarudzo iri kuuya
anofanira kuwaniswa mukana wakaenzana wokutaurwa nokunyorwa
nezvawo munhepfenyuro namapepanhau enyika. Vanhu vanosarudza vane
kodzero yokuwana ruzivo ruzere vasati vasarudza vanhu vavanoda kuti
vavatonge." Panguva ino tinoda kutsinhira kuti iyi ikodzero inotsigirwa
neBumbiro Romutemo wenyika: sarudzo inoitwa nomunhu asina ruzivo
3