kudarika zvido zvake iye”;
(2) "Anoda kuti basa rifambe: mutungamiri chaiye anoronga mabasa ane
zvinangwa zvakatsetseka. Pamusoro pazvo, anogara achitarisa kuti zviri
kuzadzikiswa here";
(3) "Anotsanangura basa rose raanoita: munhu anorondedzera kuvanhu
zvaari kuita uye kuti ari kuzviitirei. Hazvimunetsi napaduku pose kuti
atsanangurire ruzhinji rwavanhu mashandisiro aanoita nemari yavo";
(4) "Anomira pachokwadi: munhu akanaka kusarudza ndouyo anotaura
chokwadi. Izvi hazvirevi kuti mutungamiri akanaka munhu anoziva zvose
kana asina tsvekwa. Mutungamiri anobvuma kuti akanganisa anowana
ruremekedzo kubva kuvanhu nokuti anomira pachokwadi";
(5) "Anochengetedza chiremera chavanhu: Izvi zvinofanira kuwanikwa
mumutungamiri woga woga. Mutungamiri akanaka anofanira
kuchengetedza chiremera chomunhu. Kodzero dzose dzavanhu dzakaita
sekodzero youpenyu, kuwana pokugara pakanaka, kunamata
murusununguko, nedzimwe dzakadaro, dzinobva mukuchengetedza
nokukurudzira chiremera chomunhu".
Mushure meSarudzo: Kuvavarira Matongerwo Enyika Matsva
[7] Kuva nesarudzo yakasununguka ine ruenzaniso zvinoreva kuti hapana
munhu mumwechete kana boka diki ravanhu rinogona riri roga kuti ava
ndivo vakunda musarudzo. Nokudaro zvinoreva kuti pachatova navamwe
vachagumbuka nokuda kwezvichabuda musarudzo. Zvatakatarisana nazvo
hazvisi nyore. Maonero edu akasiyana uye hatiwirirani kuti tofamba sei
tichienda mberi. Zvinogona kuitika kuti sarudzo iyi ichatadza kuburitsa
mutungamiri mumwechete kana bato rimwechete rinobva rakunda mamwe
ose pokutanga. Asi kana chiri chokwadi, sokunyora kwatakaita muna March
2013, kuti: "Vanhu vazhinji vomuZimbabwe havasisina chivimbo
navatungamiri", ichokwadiwo kuti kunyanyisa kuvimba navamwe
vatungamiri kana mapato hazvina zvazvakatibatsira. Tinofanira kupinda
musarudzo takazvipira kugamuchira zvinenge zvabuda musarudzo yaitwa
navanhu murusununguko nomuruenzaniso, zvisinei kuti ndiani akunda kana
kuti ndiani akundwa.
Zvakaitika muHurumende yomuBatanidzwa (Government of National
Unity) ya2009 hazvina kufadza vamwe. Asika, sarudzo inoburitsa kusiyana
5